US-in Ukraine missile a pek chuan thil pawi zawk a thleng thei : Putin

Russia president Vladimir Putin chuan United States leh khawthlang ramte'n Ukraine tan long range missile an pe a nih chuan an chhanlet nghal tur thu a sawi.

US hian an ram sipai emaw NATO sipai emaw chu Ukraine-ah thawn luh an tum lo tih sawi mah se, US leh Europe ramte chuan drone, Howitzer heavy artillery, anti-aircraft Stinger leh anti-tank Javelin missile-te chu Ukraine tan an pek thu an sawi thung.

US president Joe Biden chuan kar hmasa khan Russia beihnan an hmang dawn lo tih an sawichian hnuah M142 High Mobility Artillery Rocket Systems, HIMARS tiha sawi chu Ukraine tan pek an remtih thu a puang.

Putin chuan Ukraine hnena ralthuam an pek chu thil thar an nih loh bakah an ralthuam thawn hian engmah a tih danglam loh thu a sawi a, mahse hemi rual hian US-in HIMARS system hman tur longer-range munition km 300-a hla kap thei an supply a nih erawh chuan an beihlet ngei tur thu a sawi.

"Longer-range missile an thawnlut a nih chuan kan la beih lohna hmun piah lam thlengin kan kap tawh ang," tiin Putin chuan state television channel Rossiya-1-in an kawm ṭumin a sawi a ni.

Russia sipai 31,000 chuang an thi tawh : Ukraine
Ukraine sipaite chuan February 24-a indona thlen hnuah Russia sipai 31,250 chuang an thi tawh tih an sawi.

Ukraine-a armed forces general staff chuan Russia hian tank 1,386, armoured personnel vehicle 3,400, artillery system 690, multiple-launch rocket system 209, cruise missile 551, air defence system 96, aircraft 211, helicopter 176, lawng lian leh lawng te 13 an chan tawh niin a tarlang a ni.