SKorea leh US-in NKorea vau nan missile 8 kapchhuak

South Korea leh United States chuan North Korea-in Pathiannia ballistic missile a kahchhuah chhanletnan, nimin khan missile pariat an kapchhuak ve leh.

South Korea president Yoon Suk-yeol chuan an ram ṭhenawmin an duh loh zawnga thil an tih chuan an chhanlet ve nghal zel tur thu a sawi. "Kan mipuite nunna leh himna kawngah ser pakhat pawh a awm loh nan theihtawp kan chhuah dawn a ni," a ti.

Seoul-a war memorial event-a thu a sawinaah, President Yoon chuan North Korea nuclear leh missile programme-te chu Korean Peninsula mai ni loin, Asia hmarchhak leh khawvel khawih buai thei khawpin a hlauhawm tawh niin a sawi bawk.

US leh SKorea hian a khat tawkin joint military exercise an nei ṭhin a, hei hi NKorea chuan an ngaithei lo hle a ni. NKorea-in tuipui kam chhak lama missile ṭhahnem tak an kahchhuah hnuah, ram pahnihte hian nimin khan surface-to-surface Army Tactical Missile Systems (ATACMS) pariat, US aṭangin pakhat leh SKorea aṭangin pasarih an kapchhuak a ni.