US-a hmun 3-a inkahna thlengah mi 9 thi

United States khawpui pathuma silaia inkahna thlengah mi pakua an thi a, mi ṭhahnem takin hliam an tuar.

Silaia inkahna hi Inrinni liam ta leh Pathiannia thleng niin, silai hmanga pawikhawihna thleng fo ṭhin chuan dan kengkawhtute chu kaihhruaina mumal tak siam tura nawrtu pawh an pun chak phah hle.

Kar liam ta Inrinni zana Philadelphia-a mipa pahnih intibuai chuan silai chelekin, bar chhungah mi pathum an kap hlum a, mi 12-in hliam an tuar tih police-te chuan an sawi. Inrinni zan vek khan Chattanooga, Tennessee-a bar bula inkahna thlengah mi pathum an thi a, midang 14-in hliam an tuar a ni.

Pathianni zing lama Saginaw, Michigan-a inkahna dang thlengah, mi pathum an thih bakah mi pahnih chu kah hliam an nih thu police thuchhuak chuan a tarlang.

United States-ah kumin chhung ringawt hian silaia inkahna vawi 240 aia tlem lo a thleng tawh niin nonprofit research group pakhat, Gun Violence Archive chuan a tarlang.

U.S. president Joe Biden chuan kar liam ta Ningani khan Congress-ah assault weapon khapna dan siam turin a ngen leh. An rama inpawng kahna thleng fo venna atan silai khuahkhirhna dan khauh tak siam turin a ngen a ni.