Israel-in Syria a vau

Israel Defence Minister Avigdor Lieberman chuan Syria chu a air defence system tihchhiatsakah a vau.

Kar kalta Zirtawpni khan Israel indo thlawhtheihna te chuan Shiite Hezbollah firfiakte hmun chu beiin, Syria rama an hmun eng emaw zat an kapfuh niin, Prime Minister Benjamin Netanyahu chuan a sawi. Syria chuan ground-to-air missile hmangin Israel thlawhtheihnate hi a lo kap let a ni.

Lieberman chuan Pathianni-a Israel radio-a thu a sawiah hemi chungchang hi sawichhuakin, Syria-in a air defence system chu an laka a hmang leh a nih chuan, inchhirna nei miah lohin an tihchhiatsak vek tur thu a sawi.

Syria sipaite chuan Palmyra khaw bulah Israel thlawhtheihna pakhat kap thlain, pakhat dang pawh an kap fuh niin an sawi. Mahse hei hi Israel lam chuan thu dik lo niin a sawi thung.

Israel sipai thuchhuah chuan beihpui an thlak lai hian anti-aircraft missile hmangin kah an nih thu an sawi a, mahse Syria sipaite hian kahfuh an nei lo a ni, a ti. Missile pakhat chu Israel Arrow air defence system hmangin an lo dang tih an sawi bawk.

Kum 2016 April thla khan Israel chuan Hezbollah te ralthuam tur phurtu motor rual chu Syria ramah hian an lo bei tawh bawk a ni. Israel hian beihpui a thlak chungchang hi a sawi lang ngai vak lo a, mahse tun ṭumah hian beih let an nih avangin a sawichhuak a ni. Kum 1967-a Six-Day War lai khan Israel hian Syria aṭangin Golan Heights lain, kum 1981 aṭang khan a chhuh zui a, mahse hei hi ramdangten an pawmpui lo a ni.