Catalonia-in Independence Referendum buatsaih phut

Spain aṭanga inlakhran duh, Catalonia sorkar chuan Spain central sorkar hnenah dan ang thlapa inlakhran duh leh duh loh chungchangah mipuite vote lak phalsak turin a ngen.

Catalan regional government president, Carles Puigdemont leh a vice president Orial Junqueras-te chuan thuchhuah siamin, Bri­tain sorkarin Scotland-in inlakhran chungchanga mipuite ngaihdan lak a remtihsak anga an ramah pawh phalsak ve tura sorkar laipui an phut thu an sawi.

Scotland hian UK aṭanga inlakhran chung­changah kum 2014 khan mipui ngaihdan an la tawh a, hemi ṭum hian 55% in UK-a beh chhunzawm zel an la duh a ni. Mahse nimin khan Scotland First Minister Nicola Sturgeon chuan European Union aṭanga Britain a inlak­chhuah hnuah, kum 2019-ah Scotland independence chungchangah mipui ngaihdan lak leh a phut a, hei hi Scotland parliament pawhin a thlawp rin a ni. Mahse a taka kalpui tur chuan British sorkarin a pawmpui ve leh phawt a ngai ang.

Hetih lai hian Spain Prime Minister Mariano Rajoy chuan Catalonia bialin independen refe­rendum buatsaih an tum chu danpui kalh a ni tiin a remti lo a, hei hi judiciary lam pawhin an thlawp a ni. Mahse Catalan sorkar chuan sorkar laipuiin a remtihpui loh pawhin September thlaah mipui ngaihdan lak a tum tho tih a sawi.