Chhiah tihsan duhloin kawng zawh

Lebanon khawpui, Beirut-ah sorkarin sum indaihlohna nasa tak tihziaawmna tura chhiah tihsan a tum duh loin mipuiten kawng an zawh.

Pathiannia kawngzawhte hi Beirut-a Riad el-Solh square-ah an pungkhawm a, sorkarin chhiah tihsan a tumna chu an thlawp loh thu leh, pek an tum loh thu an sawi. An ramin leiba tam tak a neih chhan chu politician-te eiruk nasat vang niin an puh bawk.

Police-te chuan kawngzawhten sorkar headquarters leh parliament building an luhkhung tur vengin an lo dang a, Prime Minister Saad al-Hariri pawhin mipui pungkhawm­te hmaah hian thu sawiin, an hmabak hautak hle mah se eirukna umbo tur chuan mipuite a thawhpui zel tur thu a sawi. Mahse mipui pungkhawmte hian PM chu rukru tia puhin, bur ruakten an vawm a ni.

Hemi hnu hian PM Hariri chuan nawrh huaihawtte chu committee din a, an thil phut te awmze nei taka sawiho pui turin a sawm.

Thuneitute chuan public sector pay tihpunna atan sum indaihlohna phuhru turin chhiah tihsan an rawt a ni. Kar kalta khan parliament member-te chuan chhiah tihsanna tur ṭhenkaht chu an lo pawm tawh bawk a ni.