SKorea president hlui Park-i thu zawtfiah

South Korea president aṭanga paihthlak, Park Geun-hye-i chu eiruknaa inhnamhnawiha puh a nih chungchangah nimin khan prosecutor-te’n thu an zawtfiah.

Prosecutor office pana a kal dawnin Park-i thlawptu mi tam tak chu a chenna-in bulah an pungkhawm a ni. Office a thlen hian reporter-te hnenah pawi a tih thu a sawi.

Park-i hian president a nih lai khan thu zawhfiah an tumna chu a dang zel a, mahse president aṭanga paihthlak a nih hnuin danin a humna te a hloh tawh avangin a dang thei tawh lo a ni. President a nih laiin, a ṭhian ṭha Cho Soon-sil-i’n firm lian hnen aṭanga sum tam tham tak a lak phalsakah puh a ni. Choi-i hi thamna la leh eiruknaa inhnamhnawihah puhin thubuai siamsak a ni tawh bawk.

Presidnet hlui hi a chenna-in aṭangin police venna hnuaiah pro­secutor office hi panpui a ni a, an kal lai hi an ram television-ah live-in an tichhuak a ni. Park-i thlawptu mi tam tak pungkhawmin, South Kora flag an lo vai a ni.

Park-i chuan Korea mipuite chungah a thiltih avanga pawi a tih thu a sawi a, prosecutor-te chu ṭha taka thawhpui a tum thu a sawi. Park-i hi South Korea president atana thlan tlin zinga paihthlak hmasa ber a ni. President a nih lai hian sorkara nihna pawimawh nei lo, a ṭhianṭha Choi-i chu sorkar policy siamna leh inrelbawlnaahte a inrawlh tir a, president nena an inṭhianṭhatna hmangin Choi-i hian a foundation enkawl tan donation pe turin company liante a nawr a, hei hi Park-i hian a hriatpui vek nia sawi a ni bawk.

Nikum December thla khan Parliament chuan Park-i ban chungchang hi a lo rel tawh a, president aṭang pawhin chawlh lailawk tir a ni. Kumin March 10 khan Constitutional Court chuan Parliament thutlukna hi pawmpuiin ban a ni ta a ni.

Park-i ban phut hian ṭum eng emaw zat Seoul-ah mipui an pungkhawm a, court thutlukna puan a nih hian Seoul leh khawpui dangah te mi tam tak, lawm avangin pungkhawm a ni. Hetih lai hian Park-i thlawptu lam chuan Constitutional Court pawnah lungawi lohna an lantir ve thung.