Mosul aṭangin civil mi 180,000 tlanchhia

Iraq sipaite chuan Islamic State (IS) firfiakte kut aṭanga Mosul khua laklet tumin beihpui an thlak chhunzawm reng a, hma pawh an sawn zel nia sawi a ni.

Sipaite hian Mosul khawpui khawchhak lam bial chu la letin an thuhnuaiah an dah tawh a, khawthlang lam bial lak tumin an bei leh mek a ni. Sipai leh firfiakte inbeihna vang hian Mosul khawthlang lam biala cheng civil mi nuai 1.8 vel chu an tlanchhe tawh a, an zinga a tam zawk chu camp leh reception centre-ah an khawsa a, tam takin hmundanga an chhungtel an pan bawk.

United Nations chuan sipai leh firfiakte an la inbeih chhunzawm reng avangin civil mi tam zawk an la tlanchhiat a rinawm thu a sawi.

Iraq spaite hian nikum October thla aṭang khan Mosul khua laklet tum hian beihpui an thlak a, US kaihhruai ṭangrual ramten thlawhtheihna hmangin an lo pui bawk. Sipaite hian khawpui chhung hmun tam zawk leh a chhehvel bial pawh an la let tawh a ni.