UK-in laptop leh tablet khap ve leh

US-in Middle East leh North Africa ram ṭhenkhat aṭanga an rama airline service-ah laptop leh tablet a khap hnuah, UK pawhin Middle East paruk aṭangin electronic device ken luh a khap ve leh.

Egypt, Jordan, Lebanon, Saudi Arabia, Tunisia leh Turkey aṭanga Britain direct flight service-ah laptop, tablet leh electronic device dangte hi khap a ni dawn niin sorkar thupuangtu chuan a sawi. Electronic device hian passenger leh flight tan harsatna a siam theih bakah, British mite himna chu an ngaih pawimawh ber a nih avangin khapna hi siam an nih thu a sawi. Khapna hian DVD player bakah phone lian chi pawh a huam tel dawn a ni.

Aviaton security chungchangah Prime Minister Theresa May hoin meeting ṭum eng emaw zat nei alo ni tawh a, Thawhlehni zing khan khuahkhirhna siam hi an rel ta a ni. Khualzinte himna atan he khapna thupek hi khauh taka kenkawh a nih tur thu a sawi bawk.

US pawhin Middle East leh North Africa ram pariat aṭanga an rama airline service-ah electronic device ken hi a lo khap tawh bawk a, he khapna siam a nihna chhan chu Islamic State (IS) firfiak pawlten thlawhtheihna-ah puak thei thil, electronic device-a thukrua tawlhluh an tum nia hriat a nih vang a ni.