NKorea missile test hlawhchham
North Korea chuan nimin khan missile a enchhin leh a, mahse a hlawhtling lo niin, South Korea leh US official-te chuan an sawi.
SKorea defence ministry chuan nimin zing khan NKorea hian Wonson air base aṭangin missile pakhat a kapchhuak leh a, mahse a target a fuh hmain boruakah a puak niin a sawi. Missile an enchhin hi eng ang chi nge tih hriat an tum mek tih a sawi bawk.
NKorea hian Pathianni khan rocket engine thar chu hlawhtling takin alo enchhin tawh a, engine thar enchhinna hun hi an ram hotu lu ber Kim Jong-Un pawhin a enpui a ni. Tun thla tir lam khan NKorea hian hlawhtling takin ballistic missile pali a lo enchhin tawh bawk a, heng zinga pathum chu Japan hnaih takah a tla a ni.
US Pacific Command thupuangtu, Commander Dave Benham chuan US Pacific Command chuan NKorea missile kahchhuah hi a hria tih sawiin, launch pad aṭanga kahchhuah a nih hnu lawkah a puak zui ta niin a sawi.
United Nations chuan NKorea hi missile leh nuclear test reng reng a neih a khap a, mahse khap a ni chung hian ṭum eng emaw zat a enchhin tawh a ni. NKorea hian intercontinental ballistic missile, US ram laili thleng kap pha thei pawh a siam nia sawi a ni a, mahse hei hi mithiam tam tak chuan an ring lo.
US Secretary of State Rex Tillerson chuan Japan, South Korea leh China-te tunhnaiah a tlawh a, heng ram hruaitute nen hian North Korea-in missile leh nuclear a enchhin chungchangte an sawiho a ni. Tillerson chuan NKorea hi SKorea leh US sipaite himna tiderthawng zawnga a che zui zel a nih chuan sipai chakna hman a ngaih hun pawh ala awm maithei niin a sawi.