UK Parliament bula pawikhawihna thlengah mi panga thi
London-a UK Parliament bul, Westminster Bridge-ah Nilaini zan khan mi pakhatin ke-a kalte chu a car-in a su lui a, mi pathum an thi. Parliament bula railing chu a sut hnuah a chemte nen building chhungah luh tumin a bei a, police officer pakhat a vit a, amah hi police-te’n an kaphlum ve nghal a ni.
He pawikhawihna thleng vang hian mi 40 chuangin hliam an tuar a ni.
Pawikhawihtu hming leh nihna hi puanzar a la ni lo a, firfiak pawl an inrawlh em tih sawichian a la ni lo bawk. London Metropolitan Police Commissionser Mark Rowley chuan pawikhawihtu hian firfiakte thiltih entawna che nia a lan thu a sawi a, Islam firfiakte an inrawlha an rin thu a sawi. Pawihkhawihtu hian thurualpui a nei lo nia hriat a ni.
Rowley chuan pawikhawihtu hian ke-a kalna hmunah a car hi chak taka khalhin, kawng kallaite chu pawng sut niin a sawi a, hliam tuar zingah hian police officer pathum an tel. A car hian railing a sut hnuah a chemte nen tlanchhuakin, midang awmte chu a bei zui leh a ni. Ralthuam dang erawh a keng lo nia sawi a ni. He pawikhawihna thleng hian mipuite a tichiai hle.
Britain Prime Minister Theresa May chuan pawikhawihna thleng chu a dem takzet tih sawiin, a chet duhna hmun aṭang chuan tihpalh thil a ni lo, a ti. Pawikhawhtu firfiak chuan khawpui laili lai, hnam hrang hrang leh sakhaw hrang hrangte zalen taka an awmna hmun ngeiah pawikhawihna thlen hi a tum a ni, a ti. PM May-i hian emergency meeting a ko nghal bawk. London-a pawikhawihna lian a thlen hnuhnun ber chu kum 2005, July thla kha a ni. Mipui lun lai takin public transportaion system beih nan bomb tipuah a ni a, mi 52 an thih bakah mi 700 chuangin hliam an tuar a ni.
London Mayor Sadiq Khan chuan Nilaini zana pawikawihna thleng vang khan khawpuia cheng leh tlawhtute himna turin venhimna khauh zawka kalpuiin, police duty tam zawk dah an ni tawh tih a sawi. Mipuite leh London-a cham mek, mikhualte pawh chiai lo turin a chah nghal bawk. Firfiakte chetna chuan London mipuite a tihzam mai dawn loh thu a sawi.
UK-a pawikhawihna thleng hi ram hrang hrangin an dem thu leh an tawrhpui thu an sawi nghal. Germany Chancellor Angela Merkel chuan pawikhawihna thlen chhan chu la chiang lo mah se, Germany sorkar leh mipuite chuan Britain-in firfiakte nuaibo tura a beihletna kawng hrang hrangah an thlawp tlat dawn tih a sawi.
US President Donald Trump pawhin pawikhawihtute beih letna kawngah US chuan theihtawpa a thawhpui zel tur thu a sawi.
Turkey President Recep Tayyip Erdogan chuan British PM hnenah a tawrhpuina lehkha a thawn a, firfiakte doletna kawngah Turkey chuan a ṭhianṭha tak UK chu a thlawp zel dawn a ni, a ti. Nilaini zan vek khan pawikhawihna thlenga thi te sunna atan France chuan Paris-a an hmun hmingthang, Eiffel Tower light a tithim bawk.