Myanmar tualchhung sorkarin police force siam dawn

Myanmar-a sipai rorelna dotu, tualchhung ṭangrual sorkar chuan Thawhlehni khan anmahni pualin police force an din dawn tih an sawi a, sipai sorkar paihthla turin theihtawpin hma an la zui zel.

Nikuma Aung San Suu Kyi kaihhruai civil sorkar paihthlak a nih hnuah sipai rorelna duh loin Myanmar mipuite chuan lungawi lohna an la lantir chhunzawm reng a ni.

Sipai sorkar chuan anmahni dodaltute chu firfiak pawl tia koin, an zingah hian tualchhung sorkar, National Unity Government (NUG) pawh a tel.

NUG chuan mipuite pawmpui police force a awm chuan tualchhungah thuneihna kengkawh turin an inpeih tih an sawi. Force din an tum chhan sawiin, "Sipai sorkarin mipui chunga human rights bawhchhiatna te, war crime leh tharumthawhna a kalpuite thungrul turin hma lak kan tum,"an ti.

Police force hi eng ang taka din nge a nih dawn NUG hian a la sawichiang lo a, mi engzat nge an lak dawn pawh sawichian a la ni lo. NUG hian nikum aṭang khan sipai sorkar paihthla turin campaign-te buatsaihin, chhiah pe lo turin miputie pawh an ngen bawk.

NUG chuan nikum vek khan mipuite chu sipai sorkar dodal zawnga ke rawn pen turin a sawm a, sipai beilet turin People's Defence Forces an din thu an puang bawk a ni. Sipai leh tualchhung pawlte inbeihna avang hian Myanmar mi 7,00,000 vel chu himna zawngin an tlanchhe tawh niin United Nations chuan a sawi.