Russia Parliament-in foreign agent law khauh zawk siam dawn

Russia Parliament-a lower house chuan foreign agent-te khuahkhirhna khauh zawk siamna tur bill a pawm.

Russia foreign agent law hmasa ber chu kum 2012 khan siama ni a, he danin a huam chin hi zauh zelin non-profit organisation, media outlet leh Russia mimal bil te bakah journalist leh activist-te pawh huam tel tir leh a ni.

Thawhlehnia bill pawm takah hian a thlawp lamah vote 346 tlain, thlawp lo 17 an awm thung.

He bill-ah hian ram dang aṭanga sum leh thildang hmanga ṭanpuina dawngte chu foreign agent huangchhungah hian telh an ni.

Bill duangtu zinga mi, Andrei Lugovoy chuan Russian mi challang tak tak an hming tarlan loh te chuan United Kingdom-ah special training an neih thu leh, heng mite hian chhung lam aṭanga Russia tihchhiat an tum niin State Duma-ah a sawi.

Bill chhawpchhuah tharah hian "foreign agent-te nena inzawmna nei" caterogy pawh telh belh a ni. Lugovoy chuan foreign agent chhungte bakah an hnathawh puitute chungah pawh he dan hi lekkawh theih a nih dawn thu a sawi bawk.

Russia-in Ukraine a run aṭanga kar 15 liam hnuah dan thar khauh zawk hi siam a ni.

Putin chuan March thla khan khawthlang ramte chuan an ram enthlatu, fifth column hmang ṭangkaiin Russia phiarruk tum mah se, an ram chuan a mi leh sa tak takte chu bumhmang lakah an hriat hran nghal chat theih thu a sawi.