China-in a rukin Cambodia-ah sipai hmun a sa

China chuan an sipaite hman turin Cambodia-ah rampawna an outpost pahnihna tur leh Indo-Pacific region-a a hmasaber ni turin naval facility a sa mek nia sawi a ni.

Sipaite inkhuarna tura sak mek hi Cambodia hmar lama Ream Naval Base, Thailand tuipui kamah a awm tih Washington Post report chuan a tarlang. China hian rampawna military base awmchhun pakhat chauh, Africa khawchhak lam Djibouti ramah a la nei a ni.

Naval Base sak thar hi China-in global power ram ni thei tura a hmalakna pakhat nia sawi a ni bawk. Navy lawng lian tak tak dawl zo thei tur an sa thei a nih chuan an ramin region-a an thuneihna belhchhahtu atan a ṭangkai dawn hle tih US official leh analyst-te chuan an sawi.

"Indo-Pacific hi China hruaitute tan chuan hmun pawimawh tak a ni a, Indo-Pacific hi hman aṭang tawha China kuta awm leh thuneihna hnuaia awm nghet tlatah an ngai," tiin khawthlang official pakhat chuan a sawi.

China hian an sipaite'n base an hman theihnan a rukin inremna an ziak tih US leh a thawhpui official-te chuan an sawi niin The Wall Street Journal chuan kum 2019 khan an lo tarlang tawh a ni. Mahse khatih hunlaia Cambodia prime minister Hun Sen leh Chinese defence ministry chuan report hi thudik lo tiin an pha ve ve thung.