Israel-a US ambassador atan Friedman pawm

US Senate chuan President Donald Trump-an Israel-a US ambassador atana bankrupcy lawyer hlui, David Friedman a rawt chu a pawmpui.

David Friedman hi Israel-in Palestinian ram a luahsaka Juda-te chenna in a sak thlawptu ruh tak a ni a, ṭawngkam hriam tak tak pawh a lo chhakchhuak foa ni. Hei vang hian ambassador atana President Trump-an a rawt tirh pawhin sawizui a hlawh hle.

Ningani-a confirmation hearing neihnaah, Friedman chuan tunhma lama ṭawngkam na tak a lo chhakchhuah ṭhin avangin thupha a chawi. Senate-a vote laknaah Friedman thlawptu lamah vote 52 tlain, a duh lo lamah vote 46 a tla a ni.

President term hlui, Barack Obama term a tawp hnu khan a hun laia ambassador a ruat eng emaw zat chu an bang a, post ruak 70 chuang zet hnawhkhah lohin an la awm a ni.

President Trump-an ambassador atana Friedman a rawt hi Israel chuan a lo lawm hle a, Senate-in a pawmpui hnuah Israel Prime Minister Benjamin Netanyahu chuan Friedman chu an President Trump-a aiawh leh Israel ram ṭhianṭha anga an lo lawm tur thu a sawi.

Friedman hi Orthodox Jew niin, a pa hi New York rabbi a ni. American Friends of Beit El Institutions president a ni a, Palestian khawpui, Ramallah bula Juda-te chenna in sakna atan dollar tam tham tak a tuakchhuak tawh. Israel leh Palestian buaina chinfelna tura ram pahnih din tumna dodaltu a ni bawk. Kum 15 chhung chu bankrupcy lawyer hna a thawk a, nikuma US President thlanna neih dawn khan Trump-a adviser atan dah a ni.

President Trump chaun Japan-a an ambassador atan sumdawng William Hagerty a rawt dawn niin White House chuan a puang. Hagerty hi Tennessee lam mi niin, private equity firm Hagerty Peterson dintu a ni. Japan ramah hian Boston Consulting Group management consultancy-ah hun eng emaw chen a awm tawh a, a hnuah President George HW Bush tan a thawk a ni. President rawtna hi US Congress in a pawmpui chuan, Japan-a ambassador awmlai Caroline Kennedy a thlak ang.