London-a pawikhawihtu zirtirtu hlui

Nilaini zana London-a Westminster Bridge bula pawikhawihtu, mi pali tihhlumtu hming chu police-ten an puang a, Khalid Masood-a chu Britain-a piang, zirtirtu hlui, Muslim-a inlet a ni tih an sawi.

Kum 52 mi, Masood-a hi London chhimchhak lam, Kent-a piang a ni a, England hmun hrang hrangah a awm kual nasa a, tun hnaiah central England-a Birmingham-ah a khawsa a ni.

Masood-a hi dan bawhchhiaa puhna leh ralthuam kawla puhna thubuaiahte thiam loh chantir a ni tawh a, mahse firfiaka chetna kaihhnawih thila inhnamhnawihna a la nei lo a, intelligence officer-te pawhin mi hlauhawmah an dah tel lo. Kum 2003 khan Eastbourne-a an intihbuainaah mi pakhat chu a hnarah chema a vih avangin jail-ah tantir a ni tawh.

London-a pawikhawihna a thlen hnu hian police-te chuan khawpui chhung hmun hrang hrang an dap nghal a, pawikhawihna thlen tuma rinhlelh mipa panga leh hmei­chhe pahnih an man. Police-te hian Masood-a apartment luah pawh an dap tawh bawk.

Pawikhawihna thlenga thite puala inkhawm hi Ningani khan Trafalgar Square-ah buatsaih a ni a, he hunah hian MP te bakah Metropolitan Police-te an tel. London Mayor Sadiq Khan chuan thu sawiin, London chu mi chi hrang hrang awmkhawmna khawpui a ni a, harsatna an tawh pawhin inlungrual takin an hma­chhawn tlang a, khawvel khawpui ropui ber a ni tih khawvel hriata lantir turin huai takin an ding tlang vek ṭhin tih a sawi.