Japan PM-in an puhna a pha

Japan Prime Minister Shinzo Abe chuan amah leh a nupuiin Japanese nationalist school tan donation tam tham tak an pe nia an puhna chu thu dik lo a nih thu a sawi.

School principal Yasunori Kagoike chuan Abe-a nupui, Akie hnen aṭangin a pasal pek tir million maktaduai khat an dawng niin Ningani khan a sawi. Educational group, Moritomo Gakuen hi school tan man tlawm uchuak takin ram a lei a, he thilah hian politics lam a inrawlh nasa hle nia sawi a ni. 

Abe-a nupui chuan a Facebook page-ah donation pea an puhna chu a dik lo niin a sawi a, mahse eptu lam chuan parliament-ah insawifiah turin an phut. Shinzo Abe chuan school-in ram a leina leh, sorkar pawmpuina a hmuh chungchangah amah leh a nupui an inrawlh tih finfiahna hmuh a awm chuan PM a nihna aṭanga a ban tur thu a sawi.