Hong Kong chief executive atan Carrie Lam thlang

Hong Kong electoral committee chuan chief executive thar atan Carrie Lam-i an thlang. Carrie Lam China sorkar pawhin a thlawp a ni.

Nimina elector-te’n vote an thlakah vote 1,194 a tla a, Lam-i hian vote 772 a hmu a ni.

Kum 59 mi, Lam-i hi China sorkarin a thlawp a, inthlan hma pawhin chak tura rin ber a ni. Lam-i hi hmeichhe zingah Hong Kong chief executive ni thei hmasa ber a ni bawk.

Nimin chief executive thlan lai hian democracy thlawptu lam chuan lungawi lohna an lantir thung a, inthlan kalphung chu an duh loh thu an sawi.

Lam-i chuan thlan tlin a nih hnua thu a sawiah, Hong Kong hotu lu ber hna, kum nga chhung a chelh turah khawtlang buaina awm ṭhin tihtawp chu a ngaih pawimawh ber tur a nih thu a sawi. Khawpuiin hma a sawnna tura rawtna nei duhte chu a lo lawm zel dawn tih sawiin, ṭhalaite chu an hmahruaitu, hma an sawn theihna tura nawr kaltu a nih tur thu a sawi.

Hong Kong khawpuiah hian mihring maktaduai 7.3 chuang zet an cheng a, hetihlai hian khawpui roreltute hi mipuiten thlang loin, member 1,200 awmna electoral member-te’n an thlang ṭhin. Mipuiten an roreltu tur thlang lo a, electoral member tlemte chauh kuta dah a ni hian sawisel a hlawh fo a ni. Tuna electoral member zingah hian China thlawptu an tam zawk a ni.

Inthlan hmaa mipuite ngaihdan lakah candidate zingah finance hotu hlui, Jong Tsang chu chief executive atana duhtu ngah ber a ni.