Vote lak hmain Trump-a healthcare bill hnukkir
US President Donald Trump-a’n President hlui Barack Obama healthcare programme, Obamacare thlakna tura healthcare bill a siam thar chu Congress-ah vote lak a nih hmain hnuhkir a ni.
Republican House Speaker Paul Ryan chuan, Trump-a healthcare bill hian Congress-ah tlang tura vote hmuh ngai zat a hmu dawn lo nia a lan avangin President nen hian hnuhkir leh phawt an remti niin a sawi. Congress-ah hian tlang turin member 215 talin an thlawp a ngai dawn a ni.
Republican member zinga 28-35 in kar chuan President Trump-a American Health Care Act(AHCA) draft chu an thlawp dawn lo nia sawi a ni. Member ṭhenkhat chuan bill thar duanah hian health coverage paih ṭhen a ni nasa lutuk niin an sawi a, ṭhenkhat chuan an duh angin Obamacare a thlak danglam nasa lo niin an sawi thung.
Mipui ngaihdan lak hnuhnung berah pawh bill thar siam tum hian thlawptu a nei ṭha lo a, 17% chauhin ṭha an ti a ni.
Congrss Budget Office (CBI) chuan AHCA hian kum 2017-2026 chhungin an ram sum indaihlohna chu dollar tluklehdingawn 336 zetin a tihkiam phah dawn niin a sawi. Hemi rual hian he bill hi hman a nih chuan hemi hunchhung vek hian America mipui zinga health insurance nei lo chu mi maktaduai 52-ah an pung chho dawn niin a sawi. Obamacare hnuaiah hian health insurance nei lo mi maktaduai 24 an awm a ni.
President Trump chuan a healthcare bill an hnuhkir hnuah, Obamacare chu a la puak keh ngei dawn niin a sawi a, mahse a chhan erawh a sawilang lo.