Pakistan-in kawlphetha renchemna atan zan dar 8.30 thleng bak dawr hawn phal lo

Sum harsatna vanga talbuai mek Pakistan sorkar chuan kawlphetha renchemnna atan Islamabad khawpuia innei turte chu zan dar 10 hmaa programme zo fel tur leh, ramchhunga dawrte chu zan dar 8.30 thleng bak inhawng lo turin a hriattir niin media report chuan a tarlang.

Kawlphetha indaih lohna hian an economy thlengin a nghawng chho tawh a, ramchhunga thil zawrhna hmunte chu zan dar 8.30 hnu lama khar lo thei loin National Economic Council (NEC) chuan thupek a tihchhuah a ngaih phah ta a ni. Prime minister Shehbaz Sharif kaihhruaiin province zawng zawnga chief minister (Khyber Pakhtunkhwa CM tiam lohin) te chuan Nilainia meeting an neihah he thutlukna hi an siam ta a ni.

Power minister Khurrum Dastagir chuan sumdawnna hmun khartir hma leh in lam aṭanga hnathawh tur siamrem chu kawlphetha renchemna atan a ṭangkai dawn tih a sawi. "He ram hian kawlphetha MW 22,000 a siamchhuak thei a, kan mamawh zat erawh MW 26,000 a ni," tiin MW 4,000 velin an mamawh zat an hmu phak lo tih minister chuan a sawi.

Cabinet chuan energy an hman tihtlem a, electricity load shedding chu nikhata darkar hnih vela tihtlem a nih theihna tura hma lain, Inrinni pawh sorkar chawlhah an puang tawh a ni.

Pakistan hi an ram economy tlachhe mek leh prime minister kalchhuakta Imran Khan leh a hote'n lungawi lohna an lantir bawk avangin an ram politics pawh a chiri hle a ni. Buaina chingfel zawnga hma an la vat lo a nih chuan Sri Lanka dinhmun ang tawng ve thei mai dinhmunah an ding mek.