China-in an ram enthlatu hrilh thei hnenah lawmman USD 15,000 thleng pek a tiam

China chuan an ram himna, national security tiderthawngtu hrilh thei hnenah lawmman atan yuan 1,00,000 ($15,000) chuang pek a tiam.

Thuneitute chuan rampawn aṭanga an ram enthlatu chhuichhuak a, hnawhchhuah tumin ngawrh takin beihpui an thlak mek. An ram phiarru tute hrilh thei hnenah hian spiritual rewards certificate emaw pawisa faia emawa pek an nih tur thu Ministry of State Security thuchhuak chuan a tarlang.

Lawmman hi an thu thlen dan azirin level paliah ṭhen a ni a, a tlem ber yuan 10,000 aṭanga inṭanin yuan 1,00,000 chuang thleng an dawng thei dawn a ni. An ram phiarru tute nihna emaw an chetlakna emaw chu chiang taka tarlan a ngaih thu leh, an chanchin chu thuneitute la hriat ngai loh a ni tur a ni, a ti.

Report hi mimal, online post leh state security hotline hmanga thehluh theih a ni.

China thuneitute chuan kum tam tak chhung chu a ram mipuite chu foreign spy leh China-a an thawhpuite nihna chu propaganda leh incentive campaign hmanga hriattir ṭhin turin an lo ngen fo tawh a, an ram hruaitu Xi Jinping hnuaiah nasa zawkin hman a la thar leh a ni.

Kum 2017 khan, Beijing municipal sorkar chuan an ram enthlatu, spy zawnchhuah kawnga pui theite hnenah yuan nuai nga ($75,000) pek an lo tiam tawh. Hemi kum vek hian, thuneitute chuan report 5,000 dawn an dawng a, thuruk rawn thlentu scientific researcher aṭanga taxi khalhtu thlengin lawmman hi an pechhuak vek niin Beijing News chuan a tarlang.