WFP leh Uber thawkdunin Ukraine ṭanpui dawn

United Nations hnuaia World Food Programme (WFP) chuan Nilaini khan Uber nena thawkdunin indona vanga talbuai mek Ukraine mipui tan chhawmdawlna an thawn dawn tih an puang.

Area ṭhenkhata truck lian kaltlang theih lohna hmunah WFP chuan Uber technology hmangin motor te zawk hmangin chhawmdawlna thawnchhuah leh chhuizui hna an thawk dawn tih an sawi.

Dnipro-ah chuan eitur an thawn tawh thu sawiin, Ukraine khawpui Kyiv bakah Lviv, Vinnytsia leh Chernivtsi-ah te pawh a semchhuah hna hi kalpui a ni tawh niin WFP thuchhuah chuan a tarlang.

"He platform kaltlang hian, WFP chuan eitur nei lo mipuite awlsam zawkin a pe thei dawn a, lirthei hrang hrang hmangin an thawnkual ang a, an thlenna tur hmun thleng an chhui hnuah him takin an thil thawn chuan an tumram a thleng em tih a enzui dawn a ni," a ti.

Uber chief executive Dara Khosrowshahi chuan an platform chu a thlawn veka hmantir a ni dawn tih a sawi a, "Kan technology hmangin WFP chuan ramchhunga WFP warehouse aṭanga km 100 bialah, car leh van hmangin ei tur thawnchhuah te, chhui leh enkawl hnathawhte a kalpui thei dawn a ni," tiin a sawi.

Russia-in February thlaa a run aṭangin Ukraine-ah hian mi sang chuang an thi tawh a, mi maktaduai chuangte chuan an chenna hmun chhuahsan tawhin, an rama hmun tam tak chu tihchhiat a ni tawh bawk. WFP chuan June thla tawp lamah chuan Ukraine-a cheng mi maktaduai thum chuangte hnenah thla tin chaw leh pawisa an semchhuah theih tur thu a sawi a ni.