Russia police-te’n eptu hruaitu man

Russia police-te chuan Pathianni khan Prime Minister Dmitry Medvedev ban phuta nawrh huaihawt mi eng emaw zat an man a, an zingah hian eptu pawl hruaitu Aexei Navalny pawh a tel.

Pathiannia nawrh huaihawt hi kum 2011/2012 hnua Russia sorkar duh lohna lantira nawrh huaihawt neih leh puitham ber a ni. Russia hian nakkumah president an thlang dawn a, he inthlanah hian Vladimir Putin chuan a term li-na turin chuh leh a tum. Russia mipui zingah President atana Putin duhtu hi an la tam hle a, eptu pawlte hian an la paihthlak theih a rinawm loh. Mahse Navalny hian inthlan hunah Putin hi khin a tum.

Russia Parliament chuan Moscow-a eptuten nawrh an huaihawt hi khawpui chhunga thuneitute pawhin rem an tihsak lo tih a sawi a, hei vang hian dan kalha pungkhawmte chu dang turin a ti a ni.

Police-te chuan Moscow-a Pushkin Square-ah hian mi 7,000 - 8,000 vel an pungkhawm niin an sawi. Navalny chuan PM Medvedv chu a hlawh bak sum tam tak laluh belhah a puh. St Petersburg-ah mi 5,000 vel an pungkhawm bawk.

US sorkar chuan Navalny leh nawrh huaihawtnaa telte man an ni chu a dem thu a sawi a, chhuah turin Russia sorkar a phut. State department thupuangtu Mark Toner chuan thuchhuah siamin, Russia mipuite chuan ram dang mite ang bawkin sorkar langtlang leh rintlak neih an duh a, dan hnuaiah ang khata ro relsak an duh a ni, a ti.