Iran-in US firm 15 hrekna a siam

Iran sorkar chuan US company 15-te chu mihring dikna chanvo palzut leh Israel thawhpuiah puhin an rama sumdawnna ti thei lo turin a hrek.

Iran foreign ministry chuan heng company-te hian Palestinian mite beih letna turin Israel tan silai leh hmanraw dangte an supply niin a puh a, an rama company thil neihte chu khawih chet theih loha hrek sak an nih bakah, company official-te pawh visa pek an ni dawn lo tih a sawi. Iran-in firm a hrek zingah hian United Technologies, ITT Corporation, Magnum Research INC, Military Armament Corporation leh Bushmaster Firearms International-te an tel. Anni bakah Re/Max Real Estate pawh telh a ni a, he estate hi Israel-in Palestinian ram a luahsaka Judate chenna in sak chungchangah in leh lo hralh kawngah a inrawlh niin Iran chuan a puh.

Hetih lai hian US company hrek zinga a tam zawk hi chu Iran-ah an inbun lo a, hei vang hian awmzia a nei thui vak rin a ni lo. US-in Iran nuclear programme kalpui mek thawhpuia puh, foreign firm ṭhenkhatte hrekna a tihchhuah avanga Iran-in a chhan letna anga ngaih a ni. US chuan thla hmasa khan Iran ballistic missile progamme leh Revolutionary Guard thlawptu mimal leh company eng emaw zat hrekna tur hi a tichhuak a ni.