Helpawl court-in thi turin Yemen president chungthu a relsak

Yemen rama helpawl, Houthi court chuan an ram president Abdradabo Mansour Hadi chu ram phatsantuah puhin thi turin a chung­thu a relsak.

Houthi hi President Hadi-a kaihhruai sorkar lakah helin sorkar sipaite nen pawh an inbei nasa hle a, an ram khawpui Sanaa chu sorkar kut aṭanga lain President pawh hi chhim lamah a tlanchhia a, sorkar hmunpui pawh an sawn a ni. Hetih­lai hian Houthi-te hian Sanna hi khawpui hi awpin sorkar hran an siam ve bawk.

Saudia Arabia kaihhruia Arab ṭangrual ramte chuan Hadi-a kaihhruai sorkar thlawpin, kum 2015 March thla aṭang khan Houthi lakah hian beihpui an thlak a ni. Hadi-a sipaite hian helho an beihnaah hma an sawn zel a, mahse an ram khawpui chu helho kutah hian a la awm a ni. Tualchhung indona thleng vag hian mi 7,700 chuang an thi tawh a, mi 40,000 chuangin hliam an tuar tawh bawk niin United Nations chuan a sawi a, himna zawnga tlanchhia hi mi maktaduai thum vel an awm.

Houthi court chuan President Hadi chu kum 2014 February thlaa a term a tawp hnuah pawh president dinhmun la luah zui zelah an puh a, hei bakah hian Saudi Abaria kaihhruai ṭangrual ramte pawh beihpui thlak tura puntu leh, Yemen ram zah lohah an puh a ni. Houthi court hian Sadi bakah a kaihhruai sorkara official paruk chu thi turin an chungthu a relsak bawk.