Ukraine President-in NATO Summit hmanpui dawn

North Atlantic Treaty Organization (NATO) deputy secretary-general Mircea Joane chuan Ukraine president Volodymyr Zelenskyy chu Madrid-a NATO summit hmanpui tura sawm a nih thu a sawi.

He summit hi Pacific-a NATO thawhpui ram Australia, New Zealand, Japan leh South Korea-te pawhin an rawn telpui dawn niin Joane chuan a sawi. "NATO huang tihzauhte, open-door policy neihte chu sawiho tur pawimawh tak tak zingah an tel. Finland leh Sweden-te hian min rawn zawm kan beisei. Ukraine chungchangah thutlukna kan siam a ngai a, President Volodymyr Zelenskyy chuan Madrid-ah he summit hi min hmanpui ngei dawn a ni," tiin Mircea Joane chuan a sawi.

Ukraine-in Kherson-a Russia sipai tawmbuk an kap
Ukraine chuan nimin khan Kherson region-a Russia sipaite tawmbuk an kap tih sawiin, Kyiv-a sipaite chuan indo ṭantirha Russia thuhnuaia territory awm mek chu lak let leh tumin theihtawp an chhuah tih an sawi.

"Kan thlawhtheihnate hian hmelmate inkhuarna bakah, an ralthuam leh hnathawkte awmna hmun leh Kherson region-a hmun panga chu an kap a ni," tiin defence ministry chuan thuchhuah a siam.

Crimean peninsula hmar lam hnaiha awm Kherson hi kum 2014 khan Russia chuan an lo laksak tawh a, February 24-a Ukraine an run hnua Russia kuta tlulut hmasa ber zinga mi a ni.

Ukraine chuan an ramte laklet leh tumin ṭan an khawh leh mek a,sipai inepna boruak chu a la ṭang hle tih President Zelenskyy chuan nimin zing khan a sawi. "Nilengin bomb puak ri ring tak tak hriattur a awm reng a, region-a ramri bulah indona hi an la chhunzawm zel a ni," a ti.