Thailand-in Cannabis khapna hlip, dan khauh tak kengkawh thung dawn

Thailand chuan Ningani khan cannabis (marijuana) khapna dan hlipin, Asia ram zinga he ruihhlo khapna hlip hmasa ber a ni.

Hetihlai hian health minister Anutin Charnvirakul chuan ruihna tura lo zu ṭhinte chungah erawh hremna na tak kenkawh zel a la ni dawn tih a sawi nghal.

Charnvirakul chuan dan phalna hnuaia cannabis siamchhuah chuan nasa zawkin an ram economy a ṭhat phah a rin thu sawi mah se, nuamtawlna atan leh ruihna tura hman chu danin a la phal loh thu a tarlang.

Thailand deputy prime minister ni bawk Charnvirakul chuan sawi chhunzawmin, "Dan hnuaiah hman dan tur bithliah kan siam a, zuk atan leh a ṭha lo zawnga cannabis hman chu khap reng a la ni," a ti.

Khapna dan hlih a nih tak vangin marijuana chin leh zawrhte chu dan bawhchhiatna a ni tawh dawn lo a, dam lo enkawlna atan pawh phal a ni tawh a ni.

Cafe leh restaurant-te pawhin cannabis aṭanga siam ei leh in tur te chu chhawp phal a ni tawh ang a, mahse heng product-ah hian psychoactive compound lian ber, tetrahydrocannabinol (THC) 0.2% aia tam a awm tur a ni lo.

Public Health Act chu khauh takin an la kengkawh chhunzawm zel dawn a, vantlang hmuna cannabis zute chu thla thum chhung lungina tan leh USD 800 chawi tir an ni ang.

Thailand hian kum 2018 khan damdawi anga marijuana hman phalna an lo tichhuak tawh bawk a ni. Hemi hnu hian, cannabis kaihhnawiha dan siamte chu thlahdul chho zelin, cannabis buds leh pangpar-te chu narcotics an khap zing aṭangin an paih leh bawk a ni.