Jared Kushner-a thu zawtfiah dawn

US President Donald Trump-a makpa leh a senior adviser zinga mi, Jared Kushner-a chu 2016 election campaign laia Russia ambassador leh Russia bank hotu a hmuh chungchangah Senate Intelligence Committee-in thu an zawtfiah dawn.

Kum 2016-a US president thlan dawna election campaign neih lai khan Russia a inrawlh nia sawi chungchang chu chhui mek a ni a, Trump campaign leh Russia official-te hian inzawmna an nei em tih te chhui a ni.

Thawhṭanni khan White House thupuangtu Sean Spicer chuan Kushner hian Republican Senator Richard Burr-a kaihruai Senate Intellingence Committee hmaa inlan chu a hreh lo tih sawiin, campaign lai leh President thuneihna inhlanchhawn a ni laite khan Jared chu foreign sorkar leh official-te biakpawhna lama mi pawimawh tak a ni, a ti.

Kushner-a hi Trump-a fanu, Ivanka Trump nen inneiin fa pathum an nei a ni. Nikum December thla khan Washington-a Russia ambassador Sergei Kislyak nen an inhmu nia sawi a ni. Russian state development bank Vnesheconombank (VEB) pawhin an bank executive-te’n election campaign laiin Kushner hi an hmu tih a sawi a, hei hi bank-in hmalakna thar a kalpui tur chungchangah niin, Europe, Asia leh America-a financial institute aiawhte an hmu niin a sawi. Kushmer pawh hi an chhung real-estate firm, Kushner Company hotu a nihna anga hmu an nih thu a sawi.

Kum 36 mi, Kushner hian foreign relations chungchangah President Trump hi thurawn pawh a pe tawh a, campaign dawn leh President atana lakluh a nih hnua a staff tur thlannaah pawh Trump hi a pui nasa hle nia sawi a ni.

Democratic National Committee communication director John Neffinger chuan Trump-a team leh Russia chuan inzawmna an nei em tih uluk taka chhui chian a ngai tih a sawi a, finfiahna an nei lo chungin Russia leh Trump-a campaign team hi election campaign lai khan an inbe pawp fo a, eng thu nge an sawi erawh an hriatpui lo tih a sawi.