Israel PM-in Trump-a thawhpui zel a tum thu sawi

Israel Prime Minister Benjamin Netanyahu-a chuan Palestinian leh Arab ram dangte nena inremna a awm theihna tura hmalakna kawngah US President Donald Trump chu a thawhpui zel dawn tih a sawi.

Washington-a American Israel Public Affairs Committee (AIPAC) policy conference neihnaah Israel PM hian video link kaltlangin thu a sawi a ni. Netanyahu chuan Israel-in a ṭhenawm ramte nena boruak muanawn tak neih zel a duh thu sawiin, hemi kawnga hmalaknaah hian President Trump chu a thawhpui dawn a ni, a ti. Hemi rual hian Palestinian-te chu Israel ram chu Juda rama pawm turin a phut nghal bawk a, hei hi Palestinian-te hian tun thlengin an la pawmpui thei lo a ni.

Netanyahu chuan Republican president thar Trump chu a budget ruahman tharah Israel sipaite chhawmdawlna tura a dah tel avangin lawmthu a hrilh a, US-Israel thawkdun chuan Iran-in nuclear programme a kalpui mek chu an dang thei ang tih a rinngheh tlat thu a sawi bawk.

AIPAC conference-a hian UN-a US ambassador Nikki Haley pawhin thu a sawi a, US chuan Iran-in 2015 nuclear deal an lo siam tawh chu a zawm ṭhat leh ṭhat loh a enthla reng dawn a ni, a ti.