Russia-in Ukraine-a chengte hnenah passport pe chhuak

Russia chuan Ukraine chhim lama khawpui pahnih, Kherson leh Melitopol-a chengte hnenah Russia passport a pe chhuak.

Ukraine ram chhunga ngeia Russian citizen siam tumna hi demin, Russia chetdan chu 'Russification' tiin a sawi. Russia president Vladimir Putin chuan he hmalakna hi chak takin a bawhzui mek tih an sawi.

Russia-a Tass news agency chuan Kherson-a cheng mi 23-te chuan Inrinni liam ta khan Russia passport an dawng tih a sawi a, he khawpuia cheng mi sang telin Russia passport hi an dil nia sawi a ni bawk.

Kherson-a military governor atana Russia-in a ruat, Volodymyr Saldo chuan khawchhunga mipuite chuan Russia passport hi dawn a, Russia khua leh tui nih thuai an duh a ni, a ti. Ukraine chuan Russia hmalakna chu territory pumkhatna tichhetu tia sawiin, President Putin thupek chu dan bawhchhiatna lian tak a nih thu a sawi.

Russia hian kum 2014 aṭanga an thuneihna hnuaia awm tawh Crimea leh Donbas hmun tam zawk ami te tan passport hi an lo pechhuak tawh a ni. Russia chuan Crimea chu an ram chinah ziak lutin, Donetsk leh Luhansk-ah inrelbawlna hran a kalpui bawk a, an thiltih hi khawvel ramdangte dem pawh a hlawh hle.

Metitopol hi Zaporizhzhia region chhim chhak lama awm niin, hmun tam zawk chu Russia sipaite kutah a awm tawh a, heng zingah hian Europe-a nuclear power station lian ber pawh a tel a ni.