US-a silai khuahkhirhna dan khauh zawk phutin kawng zawh

United States-a inpawng kahna thleng fo avangin, khawpui hrang hrangah mipuite chuan silai khuahkhirhna dan khauh zawk siam phutin Inrinni khan kawng an zawh.

US president Joe Biden chuan kawngzawhte hi a thlawp thu tarlangin, Congress chu gun safety legislation pass mai turin a ngen zui bawk a ni. Hetih lai hian Republican lam chuan he dan thlak rawtna hi an thlawp a rinawm loh nia sawi a ni.

May 24-a Uvalde, Texas-a Robb Elementary school-a inkahna thlengah naupang 19 leh puitling pahnihte chu kahhlum an ni. Hemi hnu lawkah Buffalo, New York-a inkahna dang thlengah mi 10 an thi leh a, heng thil thlengte avang hian US-a silai khapna khauh zawk siam tura nawrna chu a lian tawh hle.

Inrinni khan, kum 2018-a Parkland school, Florida-a inkahna thlenga dam chhuakte'na an din gun safety group, March For Our Lives (MFOL) chuan ramchhung hmun hrang hrang - Washington DC, New York, Los Angeles, Chicago leh hmun dangah rally 450 vel an huaihawt tih an sawi. Silai hmanga pawikhawihna thleng vanga mi an thih belh zel laiin, politician-te chu ngawi renga awm mai mai tir an tum tawh lo tih an sawi a, ram hruaitute'n hma an lak loh avangin America mipui an thih phah a ni, an ti. "Mi an thih belh zel laiin thlamuang taka in awm kan remti tawh dawn lo," tiin MFOL board member Trevon Bosley chuan a sawi.