Thi tura a hremte chungthu ngaihtuah ṭha leh turin Cambodia PM-in Myanmar sipai sorkar a ngen

Cambodia prime minister Hun Sen chuan Myanmar-a sipai sorkar chu politics-a an khingpui palite thi tura an chungthu a lo relsak tawhte chu ngaihtuah ṭha leh turin a ngen.

PM Hun Sen hian Myanmar sipai hotu, Senior Gen. Min Aung Hlaing hnenah Inrinni khan lehkha thawnin, sipai rorelna duh lohna lantirtu mi palite chu tihhlum an nih chuan khawvel ram hrang hrangin an dem dawn a, an rama muanna awmna tura hmalakna pawh a tibahlah dawn tih a sawi a ni.

Hun Sen chuan Gen Hlaing leh State Administrative Council (SAC) chu mi palite hremna an pek chungchang chu ngaihtuah ṭha leh a, thi tura hremna pek chu kaltlangpui lo turin a ngen. Southeast Asia sorkarte hi ramdang inrelbawlnaah an inrawlh khat avangin he lehkhathawn pawh hian ngaihven a hlawh hle.

Myanmar sipai thupuangtu chuan June 3 khan Aung San Suu Kyi party-a an hotu hlui kum 41 mi, Phyo Zeya Thaw leh Ko Jimmy tiha hriat lar pro-democracy activist, kum 52 mi Kyaw Min Yu-te chu an rama counterterrorism law an bawhchhiat avangin thi turin an chungthu relsak a ni tih a sawi. Anni pahnih bakah hian military informer nia rinhlelh leh hmeichhe pahnih thattua puh, mi dang pahnih pawh thi turin a hrem bawk a ni.