Trump-a’n Obama climate policy ṭhiahna tur thupek tichhuak

US President Donald Trump chuan president hmasa, Barack Obama’n sik leh sa danglam chak zel venna tura policy a lo siam­te ṭhiahna tur thupek a tichhuak ta. President chuan a thupek siam hmang hian lungalhthei laka indo puan te, hnathawhna kawnga khuahkhirhna khauh tak siamte chu tihtawp a ni ta tih a sawi.

President Trump-a’n Energy Independence Executive Order a siam hian Obama’n ruahmanna a siam paruk zet a tihtawp sak a, fossil fuel tam zawk siam theihna tur kawng a hawnsak a ni. Sumdawng pawlte chuan Trump-a thupek siam hi an fak hle a, mahse environmentalist compaigner-te chuan an sawisel thung.

Trump chuan a thupek tihchhuah hmang hian energy lama khuah­khirhna siam chu hlipin an ram tana chanchin chhinchhiah tlak tak a siam thu a sawi a, sorkar inrawlh ṭhinna chu hnukkirin, dan khirh tak siam chu hlih a ni ta a ni, a ti.

President hlui Obama hun laia climate policy siam hi Republican thuneihna state-ahte chuan lawm a hlawh lo hle a, sumdawng tam takte chu oil, coal leh gas-a innghat an nih avangin he policy hi court lamah pawh an lo khing tawh a ni. Nikum khan Supreme Court chuan he policy hi a titawp lailawk a, court-a complaint thehlutte ngaihtuah a ni.

Trump-a kaihhruai sorkar chuan sorkar hmasa-a climate policy siam hi tihtawp a nih chuan hna thawk theiin mi tam tak an awm phah dawn a, ramdang aṭanga fuel lakluha America a innghahna pawh a ziaawm phah dawn niin a sawi. President thupek tihchhuah chuan US aṭanga energy tam zawk siamchhuak turin hma an la dawn tih sawiin, sorkar hmasa khan a policy siamah hian hnathawktute dinhmun a dah pawimawh tawk lo hle a ni, a ti. Sorkar thar chuan environment humhalhna kalpui reng chung siin, mipuite hna a pe dawn a ni, a ti.

Environmentalist-te erawh chuan President thupek hi sawi­selin, hei hi America hlutna ngaihthahna a ni tiin, America mipuite hriselna, himna leh hausaknate chu din­hmun derthawngah a dah a ni, an ti. President thupek chu hmalakna thar tur ruahmanna aiin, thil tihchhiatna tura ruahmanna ni zawka an ngaih thu an sawi.