Peru-ah tuilian vangin mi 10,000 sawnchhuak

Peru ram hmarlam, Piura state-ah tui a len avangin mi 10,000 vel chu hmun him lamah sawnchhuah an nih thu state news agency Andina chuan a tarlang.

Kar kalta kartawp lam khan Piura-ah darkar 15 chhung nasa takin ruah a sur a, hei vang hian hmun tam tak chu tuilianin a chim a ni. Ruahsur nasa vang han Piura Rivers a lian nasa hle a, tuilian vang hian mi pali an thi tawh.

Peru President Pedro Pablo Kuczynski chuan tuilenna hmun hi a tlawh tawh a, harsatna tawk mek­te chu sawnchhuah thuai an ṭul thu a sawi. President chuan tuilenna biala chengte chu sorkarin an awmna lailawk tur a siam­ah a ṭul a nih chuan thla khat thleng pawh an awm a ngai maithei niin a sawi.

Nikum December thla aṭang khan Peru-ah hian ruah nasa takin a sur fo a, hei vang hian tuilian leh leitawlh pawh an tuar nasa a, chhiatna thlengah hian mi 90 in nunna an chan tawh a, mi 120,000 velin an in an chan tawh bawk.