Russia-in Ukraine lei dawh tichhia, tlanchhuahna dan pin sak

Russia sipaite chuan Ukraine-a Sievierodonetsk khawpui aṭanga khawpui dang panna lei dawh chu tichhiain, civil mite tana tlanchhuahna kawng awm theite chu an tihchhiat sak niin tualchhung official-te chuan an sawi.

Sievierodonetsk hi Ukraine-a Donbas region chhak lama inbeihna hmunpui a ni mek. Khawpui chhung ṭhenkhatte chu February 24-a indona a thlen hnua inbeihna sosan berna hmunah a chang chho mek a ni.

"Sievierodonetsk-ah na takin an innawr mek a, meter tin deuh thawah indona a thleng a ni," tiin Ukraine president Volodymyr Zelenskyy chuan video a tihchhuahah sawiin, Russia chuan Donbas-ah sipai tirh belh an tum niin a sawi bawk.

Zelenskyy chuan Russia beihna vanga naupang kum 12 mi hliam tuar lai thlalak chuan khawvel hmaah Russia hmelhmang diktak a lantir a ni, a ti. "Heng thil aṭangte hian khawvelin Russia a hmuh dan chu a danglam tawh dawn a ni. Russia beihna avang hian naupangte'n tuarin nunna an chan phah a ni," tiin Moscow-in military campaign an kalpui chu kum zabi 18-na hunlaia Russia Lal, Peter the Great-a'n Sweden awpna hnuaia ram la tura beihpui a thlak ṭum nen khan a khaikhin a ni.

Ukraine leh Russia sipaite chu Pathianni khan Sievierodonetsk kawtthler tinah an la inbeih thu Luhansk province governor Serhiy Gaidai chuan a sawi bawk.

Russia sipaite chuan khawpui chhung hmun tam zawk la tawh mah se, civil mi 100 chuangte'n tawmhimna zawnga an birukna industrial area leh Azot chemical plant chu Ukraine sipaite kutah a la awm mek thung a ni. "Civil mi 500 velte chu Sievierodonetsk-a Azot plant-ah an la awm a, chung zinga mi 40 te chu naupang an ni," tiin Gaidai chuan a sawi.

Russia chuan Siverskyi Donets luia Sievierodonetsk leh Lysychansk panna chu an tichhia tih Gaidai chuan a sawi. Lei dawh pathum zingah pakhat chiah a ding tawh a ni.