Sudan-a lawng pilah beram 15,000 an thi

Sudan-a Red sea-a Suakin lawngchawlhna bulah Pathianni khan beram phurtu lawng a pil a, he lawnga beram phurhte chu an thi vek. Lawnga thawktute erawh him taka chhanchhuah an ni.

Beramte hi Sudan aṭanga Saudi Arabia rama phurh tur an ni a, mahse lawngin a phurh thei chin aia tam an dah avangin lawng hian zo loin a pil ta a ni. Port official chuan lawng hian beram hi 9,000 vel a phurh theih laiin, bituk chin aia tam daih, 15,800 zet phurhtir a ni tih a sawi.

Port official dang pakhat chuan beram rual phurtu lawng pil hianin lawngchawlhna hmuna hna thawh kalhmang a tihbuai phah dawn tih a sawi. Ransa tam tham tak an thih avangin environment lamah pawh nghawng a nei ngei dawn a ni, a ti.

National expoters' association hotu, Omar al-Khalifa chuan lawng lian hi muang changa a pil thu sawiin, a ran phurhte pawh chhanchhuah hman theih tur chu an ni, a ti. Lawnga beram phurh hlut zawng hi USD mtd li hu a ni. He chetsualna thlen dan hi chhuichian an phut thu an sawi bawk.

May thla khan Suakin port-a cargo area-ah kangmei nasa tak chhuakin bungrua tam tham tak a lo kangchhe tawh bawk. Kangmei chhuah dan hi chhui chian ni mah se, report erawh tihchhuah a la ni lo.

Lawngchawlhna hmun hmingthang tak Suakin hi Sudan-a foreign trade hub lian ber a ni ṭhin a, Red Sea tuipui kam aṭanga km 60 vela hlaa awm Port Sudan chuan he dinhmun hi a chuhsak tawh a ni.

Suakin port cheiṭha tur hian hmalakna kalpui ni mah se, kum 2017 khan Turkey nen hmanlai huna building sakte siamṭhat leh lawng chawlh hmun tilian tura inremna an lo siam tawh chu President Omar al-Bashir paihthlak a nih tak avangin hma an la zui ta lo a ni.