SKorea court-ah president hlui Park-i inlan

South Korea President hlui Park Geun-hye-i chu nimin khan Seoul Central District Court-ah a inlan. Court chuan president hlui hi president a nihna ṭanga paihthlak a nihna chhan, eirua puh a nihna kaihhnawiha manna thupek tihchhuah a nih dawn leh dawn loh a ngaihtuah dawn a ni.

Zing dar 10 velah Park-i hian Seoul chhim lam district-a a chenna in aṭangin court hi a pan a, court a pan dawn hian amah thlawptu mi eng emaw zatin an thlah. Rorellai party-a parliament member ṭhenkhat leh presidential secretary hluite pawhin an thlah a ni.

Park-i chuanna motor chu security car leh policy motorcycle-te’n an chhawm a, chawhma dar 11 velah court hi an thleng a ni.

Court-in manna thupek tihchhuak tura prosecutor-te ngenna hi a remtihsak a nih chuan, South Korea president hlui zing­a man tawk pathumna tur a ni ang. President hlui pahnih, Chun Doo-hwan leh Roh Tae-woo te chu eiruk leh ram phatsana puh chungchangah man an lo ni tawk bawk a, mahse manna thupek hi court-ah ngaihtuah loin, prosecutor-te an tichhuak a ni. Kum 1997 aṭang khan manna tur thupek siam chungchang hi court in a ngaihtuah ṭan a ni.

Prosecutor-te chuan Park-i hi thu an zawtfiah tawh a, thu zawhfiahnaah hian president hlui chuan thamna pe, a thuneihna dik lo taka hmang, firm lian hnen­a donation pe tura nawr leh document thurukte puangzarah puhnate chu thu dik lo niin a sawi. Prosecutor-te chuan Park-i hi thubuai 13 an siamsak a ni.