Cyclone tleh leh tuilian vangin school khar

Queensland, Australia chu thlipui, cyclone Debbie-in a nuai a, thli hian ruah­tui a pai tel avangin nasa takin ruah a sur zui a, tuilian vangin nimin khan school zawng zawng khar a ni.

Ningani khan cyclone Debbie hian Queensland hi a thleng a, ruah a sur zui nasa hle. Darkar hnih chhungin Queensland khawpui, Brisbane-ah chuan ruah hi 200mm a sur hman a, ṭum danga thla khat chhunga ruahtui tla nen an inzat vel a ni. Thuneitute chuan ruahsur nasa avang hian school khar vek an nih thu sawiin, mipuite pawh pawn chhuak lo turin an ngen.

Queensland Premier Annastacia Palaszczuk-i chuan tun ṭum anga ruah­sur nasa hi an la tawng ngai lo tih sawiin, Thawhṭanni thleng school khar a nih tur thu a sawi.

Prime Minister Malcom Turnbull pawhin cyclone tlehin chhiatna a thlen dante chu sipai helicopter hmangin a enkual tawh a ni. Thlipui tleh vang hian Queensland biala chhungkaw 61,000 vel chu power supply nei loin an la awm a, in leh thlai chinna ram tam tak a lenchhia a ni.