Turkey-in Syria-a beihpui thlak titawp

Turkey sorkar chuan nikum August thla aṭanga Syria rama “Euphrates Shield” military operation a neih chu a titawp ta tih a sawi a, mahse sipaite kohkir an nih dawn leh dawn loh erawh a la sawichiang lo.

Turkey hian Free Syrian Army (FSA) helten Islamic State (IS) firfiakte an beihna kawnga pui turin sipai, tank leh indo thlawhtheihnate a tir a, Kurdish firfiakte hmasawn zel tur an dang bawk. Prime Minister Binali Yildiram chuan Operaton Euphrates Shield chu hlawhtling taka zawhfel a ni ta tih a sawi a, beihpui an thlak chhunzawm leh a nih pawhin hming dang vuah a nih tur thu a sawi.

Euphrates Shield operation hnuaiah Turkey hian Euphrates lui kama Jarablus khua chu IS firfiakte kut aṭanga la letin, ramri km 100-a thuiah firfiak awmte pawh an thianfai a, hemi hnu hian chhim lama IS chakna, Al Bab khua bei lehin firfiakte pawh an umchhuak tawhniin a sawi.

Turkey sipaite hi ramri bulah dah chhunzawm an la ni a, sipai tirh zat erawh chu sawilan a ni lo.