Israel-in an mi leh sate Turkey chhuahsan turin hrilh

Iran mite'n Turkey-a Istanbul khawpuia chawlh hmanga Israel mi zin khawthawngte thah emaw ruk bo emaw an tum nia sawi a nih avangin, Israel chuan an mi lah sate chu Turkey ram chhuahsan turin a ti.

Israel sorkar chuan May 30-a Turkey-a Israel mi awmte tan hriattirna a lo tichhuak tawh bawk a, mahse Thawhṭanni khan a aia khauh zawkin thuchhuah hi a siam leh a ni.

"Israel mi te chu Istanbul-ah zin lo turin kan ngen a, chhan ṭha tak in nei a nih loh chuan Turkey-ah hian zin suh u. Istanbul-ah in lo awm tawh anih pawhin, Israel-ah a rang thei ang berin rawn let rawh u," tiin Israel foreign minister Yair Lapid chuan a sawi. "Heng firfiakte hian Israel mi chawlh hmanga rawn zinte chu an bitum a ni. Thlan bik nei lo mah se ruahmanna felfai tak hmangin Israel mi ruk bo emaw thah emaw an tum a ni," a ti.

"Iran miten an hriat tura ka duh chu Israel mi tu pawh lo tina apiang chu hrem lohin an chhuak lo ang. Khawi hmunah pawh awm se Israel chuan a umzui dawn tho a ni," a ti zui bawk.

Lapid chuan Israel security force-te hmalakna avangin tun hnaiah Israel mite nunna chhanhim a ni tih a sawi a, hemi kawnga a puihna avangin Turkey sorkar chungah lawmthu a sawi bawk a ni.

Israel security official chuan Turkey-ah hian Iran Islamic Revolutionary Guard Corps (IRGC) nia rinhlelh mi ṭhahnem tak man an nih thu a sawi. Iran chuan Iran bakah Syria ram chhunga nuclear leh military infrastructure beitu Israel chu buaina thlen chhanah an puh thung. May 22-a Iran khawpuia IRGC colonel Hassan Sayyad Khodaei, a motor chhunga motorcycle a chuang mi pahnihte'n an kahhlumnaa mawhphurtuah Israel hi an puh a, phuba lak pawh an lo tiam tawh bawk.

Israel chuan an puhna hi an phat thu emaw an tih emaw a nih thu a la puang lo. Israel chuan khawvel hmun hrang hranga an mite thahnaa bultumtu berah Khodaei hi an puh a ni.

Turkey hi Israel mipuiten chawlh hmang tura an pankhawmna pui ber pakhat a ni. Ram pahnihte hian hun rei tak chhung inhmuhthiam lohna an neih hnuah tunhnai aṭang khan inremna hrang hrang an siam leh tawh a ni.