UN-in eitur thawnchhuah lamah khuahkhirhna siam lo turin a ngen

United Nations chuan Thawhṭanni khan World Trade Organization (WTO) meeting-a minister kalkhawmte chu khawvelin eitur lama tlakchhamna a tawh mek karah, mipuite dinhmun ngaihtuah chungin thawnchhuah lama khuahkhirhna khauh zawk siam lo turin a ngen.

UN human rights hotu Michelle Bachelet leh trade and development lama an hotu Rebeca Grynspan-te chuan Ukraine-Russia indona chuan eitur tlakchham emaw tlachham mai thei dinhmuna ding mi maktaduai tam takte dinhmun chu nasa zawkin a tihderthawn phah theih dawn a ni, an ti.

WTO ministerial conference, Geneva-a tunkar chhunga neihah hian food security chungchangah inremna siam tumin hma an la a ni.

Ram rethei zawkte dinhmun ngaichang tak chungin, eitur thar chhuak tam ram ṭhanglaite leh UN World Food Programme chunga innghat te chuan kum 2020 chhung khan, Africa ramah an eitur tharchhuah 80% leh cereal 92%-te chu continent pawn aṭangin an chaw lut tih UN hotute pahnih chuan an sawi.

Ukraine-Russia indona thleng mek hian global food security lamah hlauhthawnna thar rawn chawk chhuak lehin, Black Sea port an dan avangin Ukraine chuan a eitur tharchhuahte chu ramdangah a thawnchhuak thei lo a ni. Indona thlen hma khan, Ukraine chu khawvela wheat leh vaimim thawnchhuah tam lamah palina a ni phak a ni.

India-in wheat a thawnchhuah ṭhin an tihtlem avanga khawvel huapin a man a sang chho dawrh a, hemi hnua chini a thawnchhuah chu an khuahkhirh zui leh bawk.

May 25-a chini thawnchhuah a khuahkhirh leh hnuah, WTO hotu Ngozi Okonjo-Iweala chuan global food market-a indaih lohna an tawh mek avangin ramdangte chu an thil thar chhuahte thawnchhuah khapna emaw khuahkhirhna dan emaw siam lo turin a ngen.

WTO ministerial conference-ah hian food security leh thawnchhuah lama khuahkhirhna siam chungchangah thutlukna an siam rin a ni. He inhmuhkhawmna hi Pathianni aṭang khan ṭanin vawiinah an zo ang.