Cuba sorkar laka lungawi lohna lantir mi 381 thiam loh chantir

Cuba chuan nikum nipui laia sorkar laka lungawi lohna lantirtu zinga mi 381-te chu thiam loh chantirin, an zinga ṭhenkhat te chu kum 25 thleng tang turin a hrem.

Attorney general office thiam loh chantir zinga mi 297-te jail tang tura hrem niin, kum tling lote erawh chu hremna atan vantlang hna thawh nge an duh zawk thlan tir an ni, a ti.

Communist rorelna duh loin nikum khan Cuba ramah hian mi sang telin lungawi lohna an lantir a, 'zalenna' an duh thu an aupui a ni. He kawngzawh hi kum tam tak chhunga Cuba rama mipui punkhawmna lian ber a ni. Economy lama harsatna an tawh lai, thil man sang chak tak avang te, eitur leh damdawi lam chi tlakchhamna an tawh mek karah lungawi lohna hi lantir a ni.

Cuba-ah hian phalna nei loa vantlang hmunah punkhawm huaihawt khap a nih avangin mi 1,000 chuang chu an man a ni. Social media lama thlalak tarlanah security force-ten lungawi lohna lantirute kut an thlak leh pepper-spray hmanga an phuh laite hmuh tur a awm.

Public prosecutor chuan nawrh huaihawt, thiam loh chantir zingah hian kum 16-18 inkarte pawh an tel tih a sawi.

Kum 2021 khan, Cuba president Miguel Díaz-Canel chuan hun rei tak chhung Cuba nena inhmuhthiam lohna lo nei tawh United States chu an rama buaina thlen chhanah a puh. Miguel chuan dodalna lantirtute hi an ramchhunga buaina chawk chhuak tura hlawh neia rawih an nih thu sawiin, a lamṭangte chu rawn penchhuaka buaina tireh turin a ngen.

Sorkar laka lungawi lohna lantir zinga mi 100 chuang chu March thla khan thiam loh chantir an lo ni tawh bawk a, heng mite hi kum 6 - 30 thleng tang turin hrem an ni.

United States leh European Union chuan thubuai an ngaihtuah dan chu sawiselin, an mi man te chu a rang thei ang bera chhuah turin an ngen.