Russia-in WWII Victory Parade buatsaih

Russia chuan nimin khan an rama public holiday pui ber, Indopui II-naa USSR in Germany a hnehna ni champha, World War II Victory Day hmangin, Moscow-ah Victory Parade a buatsaih. 

Victory Day hi May 9-a neih tur kha a ni a, mahse hripui leng avangin president Vladimir Putin chuan a hun hi a sawn a, nimin khan an hmang ta zawk a ni. 

Hri leng vanga Russia rama khuahkhirhna siamte chu thlahdul ṭan ni tawh mah se, Moscow-ah chuan mi tam tak punkhawm khap chhunzawm a la ni. Hei vang hian Moscow mayor Sergei Sobyanin pawhin mipuite chu military parade neihna, Red Square-ah kal kher loin TV aṭanga lo thlir zawk turin a ngen. War veteran-te eawh chu parade neihna hmuna tel turin sawm an ni a, mah se sawmte hi a hmain Covid-19 an kai leh kai loh test vek tura tih an ni. 

Victory Parade-ah hian sipai 13,000, armoured vehicle 234 leh aircraft 75 an tel a ni. Soviet Union ram hlui tam zawk bakah China, Mongolia leh Serbia sipaite an tel bawk. Parade-a tel military unit hrang hrangte hi rehearsal an neih chhung zawngin khung hran an ni. 

Moscow bakah khawpui lian dangah pawh  military parade hi buatsaih a ni bawk a ni.