July 10-ah Singapore inthlang dawn

Singapore prime minister Lee Hsien Loong chuan July 10-ah an ram inthlanpui  neih a ni dawn tih a sawi. 

PM Lee chuan a thurawn angin Thawhlehni khan president Halimah Yacob chuan Parliament ṭhiatin, Writ of Election  a tichhuak nghal tih a sawi. Nomination day atana June 30 a rawt pawh President hian a pawmpui nghal a ni. 

Lee chuan inthlanpui an hmachhawn tur chu an ram tana pawimawh tak a ni tih sawiin, Covid-19 leng mek karah a bik taka ruahmanna siam a ni tih a sawi. Sorkar thar chuan Singapore mipuite tana thutlukna pawimawh tak tak a siam a ngai chho dawn a, inthlan zawnah buaipui nghal tur thil tam tak, hrileng chungchang te, economy leh hna siam te ngaihtuah tur a awm nghal dawn a ni, a ti. 

Hri leng vangin mipuite vote thlak dan tur leh party campaign kalpui dan turte pawh ngun taka an ngaihtuah lawk thu a sawi. Him takin an kalpui thei dawn nia an ngaih thu a sawi.  Social distancing zawm a ngaih avangin inthlanpui neih tur atan hian rally pawh buatsaih theih a ni lo ang.