Israel-in West Bank-a in sakna tur pawm

Israel sorkar chuan Palestinian ram a luah, West Bank-a Juda-te chenna tur in sakna tur a pawm.

Ningani-a Israel cabinet meeting in sak thar tur hi pawmin, Israel sorakr chuan Nablus bula Emek Shilo biala in hi sak a ni dawn tih an sawi. West Bank-ah hian kum 20 chhunga Juda te chenna tur in a sak ṭum khatna tur a ni.

Palestinian lam chuan Israel sorkar thutlukna hi an sawisel nghal a, Palestine Liberation Organisation executive committee memmber Hanan Ashrawi chuan Israel thutlukna siam hian dan loa thiltih a tum zel zia a lantir a ni, a ti.

West Bank-a in sak tharte hi Amona aṭanga Juda chhung­kua chhuah tirte awmna atan dah a ni ang. Israel Supreme Court chuan thla hmasa khan Amona-a Juda mi awmte chu Palestinian mimal ramah dan loa in sa nia sawiin a chhuahtir a ni. Hemi hnu hian Prime Minister Benjamin Netanyahu chuan an awmna tur hmun thar zawnsak a tiam nghal a ni.

Kum 1967 aṭanga Israelin Palestinian ram a luahsak, West Bank leh East Jerusalem-a Juda-te chenna tur in a sak hi Israel leh Palestinian inkar buaina thlen fotu a ni. International law hnuaiah Israel-in ram a luahsak dan kalh nia sawi ni mah se, hei hi Israel chuan a pawm ve lo a ni. Palestinian ram a luahsakah hian hmun 140-ah in sain, Juda mi 600,000 chuang an cheng mek a ni.