UN secretary general-in Israel annexation plan sawisel

United Nations secretary general Antonio Guterres chuan Israel-in Palestinian ram, West Bank luah a tumna, annexation plan chu sawiselin, hei hi international law kalh a ni, a ti. 

Guterres chuan Thawhlehni khan Security Council-ah report a peknaah he thu hi sawiin, Israel leh Palestinian buaina chungchang hi Security Council chuan ni 15 hnuah an sawi ho dawn a ni.  

Israel prime minister Benjamin Netanyahu chuan annexation plan hi July 1 aṭanga hman ṭan tur a nih thu a lo sawi tawh. Guterres chuan he annexation plan hian ram pahnihte inkar a tihchhiat zawk tur thu leh, inremna siam a nih theihna kawnga hmalakna pawh a tihbahlah phah zawk tur thu a sawi. 

Palestinian 1000 chuangin he Israel annexation plan hi an duh loh avangin Jeriko khuaah duh lohna an lantir a, ram dang mi West Bank rama awm tam takin an thlawp bawk a ni. Palestinian hruaitute chuan Palestinian ram chu independent rama siam a, ram dang sipai awm tawh lo se an duh tih an sawi bakah, East Jerusalem chu an khawpui atan an duh tih an sawi a ni.

Israel hian West Bank ram hi Palestinian ho a chuh pui a ni deuh ber a, ram ṭhenkhatten sawisel ṭhin mah se, US chuan a thlawp tlat avangin ram dang sawiselna chu a ngaihsak vak lo a ni. Kum 2017 khan Trump chuan Jerusalem chu Israel khawpuiah a puang a, hemi chungchang hi Security Council ah ngaihtuah a ni a, SC member 15 zinga 14 chuan he thil hi duh loin resolution an pass a, US chuan a veto hmangin a hnawlsak thung a ni.