Colombia-a leiminah mi 200 dawn thi

Colombia ram chhimthlang lam, Putumayo province-a ruahsur nasa avanga leiminah mi 200 dawn an thi a, mi tam takin hliam an tuar.

Colombia ramah hian ruah a sur nasat avangin lui eng emaw zat a lian a, lui lian hian lung leh chirh tam tak chu province khawpui, Mocoa khawchhungah a len lut a ni. Chhiatna thleng vang hian Colombia Presidnet Juan Manuel Santos chu Mocoa-ah hian a kal nghal a, chhanchhuah hna thawh dante a enpui a, harsatna tawk chhungkuate a tlawh nghal bawk.

Leimin vanga chhiatna tawkte ṭanpui leh chhanchhuah hna thawk tur hian sipai leh police 1,100 tirh nghal an ni. National disaster unit hotu, Carlos Ivan Marquez chuan team 150 tirh an ni a, leimin haifaina tur khawl lian pawh thawn an nih thu a sawi.

Chhanchhuah hna thawktu sipaite chuan leimin hian in tam tak a hnawl a, mi 200 vel chu an chin hriat lohin an awm a, heng mite hi an thi nia rin a nih thu an sawi. Midang 400 velin hliam an tuar bawk. Colombian Red Cross volunteer-te chuan thi zat hi 200 aiin an tam zawk an ring thung.

Colombia ramah hian leimin vangin chhiatna a thleng fo a, nikum November thla khan Mocoa aṭanga km 140 vela hla, El Tambo khuaah ruahsur nasa vanga leitawlhah mi pakua a lo thi tawh bawk a, hemi hma hian Medellin khuaah leimin vangin mi eng emaw zat an an thi bawk.