Paraguay president-in top official-te ban

Paraguay President Haracio Cartes chuan president term hnihna chuh theihna tur bill siam dodala mipuiten nawrh an huaihawta buaina a chhuah vangin interior minister leh police hotu lu ber a ban.

Kar kalta Zirtawpni khan bill siam duh lohna lantir hian nawrh huaihawt a ni a, nawrh huaihawtnaa telte chuan Congress building luhchilh an hal zui a ni. Nawrh huaihawt­tute leh police te chu innawrh buai zuiin, pungkhawm zinga mi pakhat Rodrigo Quintana chu a thi a ni. He thihna thleng vang hian police office pali man an ni tawh.

Rodrigo Quitanta ruang hi an ram khawpui, Asuncion-a eptu pawl Liberal party headquarters-ah dah a ni a, eptu pawl hruaitute chuan inthahna thleng chu an dem thu sawiin, thil awmdan chhui chiang turin sorkar an phut.

Zirtawpni khan senator 25-te chuan private meeting neiin, president-in a term hnihna atana a chuh leh theihna tur bill siamna tura an ram danpui siamṭhat tumna chu an thlawp a, meeting thutlukna an hriat hnu hian eptu lam chuan lungawi lohna hi an lantir zui nghal a ni.

Paraguay hi sipai chakna hmanga thuneihna changtu, General Afredo Stroessner rorelna hnuaiah kum 1954-1989 chhung a awm a ni. Tuna ram danpui an hman mek hi kum 1992-a siam a ni a, he danpui hnuaiah hian president dinhmun chu kum nga term niin, term khat chauh chelh theih a ni. Mahse President Cartes chuan kum 2018-a ah a term a tawp dawn avang­in president thlan huna a chuh nawn leh theihna turin he dan hi thlak dang­lam a duh a, mahse eptu lam chuan nasa takin an dodal thung. Senator-te’n an pawmpui tak avangin Parliament house dang, Chamber of Deputies-in a pawm ve leh a ngai dawn a, mahse President Cartes-a party in majority a neih avangin bill hi awlsam taka a tlang rin a ni.