Dubai-a in sak laiah kangmei chhuak

Dubai-a shopping mall lian ber, Dubai Mall bula in saklaiah nimin zing khan kangmei a chhuak a, mahse chhiatna liantham a thlen hmain ṭhelh mih hman a ni.

Kangmei chhuahna hi Dubai Mall bakah inchhawng 63-a sang, The Address Downtown Dubai tower bul a ni. He tower hi kum 2015 kum hlui thla ni khan kangmei chhuakin nasa takin alo tichhe tawh bawk a ni.

Dubai sorkar chuan nimin zinga kangmei chhuahna hi Address Residences Fountain Views towers a nih thu a sawi. Fountain Views complex hi Dubai-based developer Emaar Properties sak a ni. Tower pathum, chhawng 60 ṭheuha sang tura tih a ni a, kum 2018, April thlaah in sak hna hi zawhfel tura ruahman a ni. Kangmei hi a chhawng hnuai lama chhuak a ni a, chhawng chunglam a kangkai hman lo a ni. Hnathawktu zingah hliam tuar an awm hriat a ni lo bawk.