SKorea bungraw phur lawng chin hriat lohin awm

South Korea bungraw phur lawnglian chu South Atlantic-ah chin hriat lohin a awm a, a pil nia rin a ni.

Kar kalta Zirtawpni khan mi 24 chuanna, bungraw phur lawng Stella Daisy aṭang hian ṭanpui an ngaih thu an dawng niin, Uruguayan Navy chuan an sawi. Chhanchhuah hna thawk turin lawng tirh nghal an ni a, lawng khalhtu pahnih lawnglenga awmte chu an chhan­chhuak a ni.

SKorea company-in a hman, bungrw phur lawng-ah hian thawktu mi 24 awmin, Filipino 16 leh Korean mi pariat an ni. Lawnglian awmna hi Uruguayan tuipui aṭanga a hlat tham avangin lawng pali hmanga zawn a ni a, lawng awmna hmun nia hriat an thlen hian lawng chhe them nia rin an hmu a, oil rim na tak an hre bawk niin navy thupuangtu Gaston Juansolo chuan a sawi. Hei vang hian he lawng hi tuipuiah hian a pil nia rin a ni.

Lawnglian hi Very Large Ore Carrier (VLOC) a ni a, bungrua ton 260,000 chuang phur thei chin a ni a, Marshall Islands-a in register a ni. Brazil aṭanga kalchhuak a ni a, khawi hmun nge a pan tum hriatchian a ni lo.